Si të lulëzosh në territorin armik (2)
24. tetor e shtunë
“Në të cilin ju edhe u rrethpretë … me rrethprerjen e Krishtit” Kolosianëve 2:11
Para se t’i lejonte popullit të Tij të pushtonte dhe të banonte në Tokën e Premtuar, Perëndia urdhëroi që të gjithë meshkujt të rrethpriteshin (shih Jozueu 5:2). Rrethprerja u vendos për herë të parë nga Perëndia për Abrahamin si “një shenjë e besëlidhjes midis meje dhe jush” (Zanafilla 17:11). Akti i rrethprerjes nënkuptonte se ata ishin të veçuar nga kombet përreth, të cilët nuk e njihnin Perëndinë dhe se i përkisnin Atij. Gjatë endjeve në shkretëtirë, hebrenjtë e lanë pas dore këtë praktikë. Por përpara se të fillonin jetën e tyre të re në Kanaan, Perëndia ua rikujtoi sërish si kusht për të shijuar një marrëdhënie besëlidhjeje me Të.
Cili është sekreti i mbijetesës në territorin armik? Së pari, kujto çfarë ka bërë Perëndia për ty. Së dyti, kujto se kujt i përket. Hebrenjtë bënë atë që Perëndia urdhëroi — dhe Perëndia i mbrojti dhe u dha fitore madhështore mbi armiqtë e tyre. “Kur të gjithë mbretërit e Amorejve që ndodheshin matanë Jordanit në drejtim të perëndimit dhe tërë mbretërit e Kananejve që ishin pranë detit mësuan që Zoti kishte tharë ujërat e Jordanit, derisa kishin kaluar izraelitët, i lëshoi zemra e mbetën pa frymë nga frika e izraelitëve” (Jozueu 5:1). Përkushtimi i tyre ndaj Perëndisë solli mbrojtjen e Perëndisë. Dhe kështu funksionon ende edhe sot.
