“Sepse nuk u tërhoqa prapa për të mos ju treguar gjithë këshillën e Perëndisë” Veprat 20:27
3. maj e diel
Përqafo “gjithë këshillën e Perëndisë”
Më shumë se njëqind vjet më parë, William Booth, themeluesi i Ushtrisë së Shpëtimit, foli në mënyrë profetike kur tha: “Rreziqet kryesore me të cilat përballet shekulli që po vjen do të jenë feja pa Frymën e Shenjtë, Krishtërimi pa Krishtin, falja pa pendim, shpëtimi pa rigjenerim, politika pa Perëndinë, parajsa pa ferr”. Kjo është po aq e vërtetë tani sa ishte edhe atëherë.
Pali i nxiti udhëheqësit e kishës së Efesit të shpallnin: “gjithë këshillën e Perëndisë”. Ai tha: “Tregoni kujdes, pra, për veten tuaj dhe për gjithë tufën, në mes të së cilës Fryma e Shenjtë ju ka vënë ju kujdestarë që të kullotni kishën e Perëndisë, të cilën ai e ka fituar me gjakun e tij. Në fakt unë e di se, pas largimit tim, do të hyjnë midis jush ujqër grabitqarë, që nuk do ta kursejnë tufën, edhe vetë midis jush do të dalin njerëz që do të flasin gjëra të çoroditura që të tërheqin pas vetes dishepujt. Prandaj rrini zgjuar, dhe mbani mend se për tre vjet me radhë, ditë e natë, nuk pushova kurrë të paralajmëroj secilin me lot” (v. 28-31).
Në prag të ekzekutimit të tij, Pali ia dorëzoi stafetën pasardhësit të tij, Timoteut, me këto fjalë: “Prediko fjalën, ngul këmbë me kohë e pa kohë, kritiko dhe qorto, këshillo me çdo durim e doktrinë. Sepse do të vijë koha kur njerëzit nuk do ta durojnë doktrinën e shëndoshë, por, sipas ëndjeve të veta, do të mbledhin grumbull mësues për të gudulisur veshët dhe do t'i largojnë veshët nga e vërteta e do t'i sjellin drejt përrallave. Por ti rri syçelë në çdo gjë…përmbushe plotësisht shërbesën tënde” (2 Timoteut 4:2-5).
