Lutja e bën gjithë ndryshimin
25. gusht e martë
“Lutuni për njeri tjetrin, që të shëroheni” Jakobi 5:16
Kardiologu i krishterë Dr. Randolph Byrd kishte një interes të madh për të ditur nëse lutja kishte një ndikim “të matshëm shkencërisht” në shërim. Ai ka thënë: “Pas shumë lutjesh, më erdhi ideja se çfarë duhej bërë.” Gjatë një periudhe dhjetëmujore, një kompjuter caktoi 393 pacientë në repartin e kujdesit koronare në Spitalin e Përgjithshëm të San Franciskos në njërin nga dy grupet. Grupi i parë u mbajt në lutje nga grupe lutjeje në shtëpi. Grupi i dytë nuk u përfshi në lutje. Grupet e lutjes në shtëpi ishin nga denominacione të ndryshme të krishtera. Atyre iu dhanë vetëm emrat e parë të pacientëve dhe përshkrime të shkurtra të diagnozave dhe gjendjes së tyre. Ata luteshin për ta çdo ditë. Pacientët për të cilët u lutën ndryshonin nga ata për të cilët nuk u lutën në këto drejtime: (1) Kishin pesë herë më pak gjasa të kishin nevojë për antibiotikë. (2) Kishin tre herë më pak gjasa të zhvillonin lëngje në mushkëri. (3) Asnjë prej tyre nuk kishte nevojë për rrugë ajrore artificiale të lidhura me ventilator. (4) Vdiqën më pak.
Nëse teknika që po studiohej do të kishte qenë një ilaç apo procedurë e re, ajo do të ishte shpallur si një zbulim i madh. Madje edhe Dr. William Nolan, autor i një libri që kundërshton shërimin me anë të besimit, tha: “Duket se ky studim do t’i rezistojë shqyrtimit … Ndoshta ne mjekët duhet të shkruajmë në fletët tona të urdhrave: ‘Lutuni tri herë në ditë.’” Në Dhiatën e Vjetër lexojmë:
“‘Po, unë do të të jap përsëri shëndet dhe do të të shëroj plagët e tua", thotë Zoti” (Jeremia 30:17). Në Dhjatën e Re, Jakobi shkroi: “Lutja e besimit do ta shpëtojë të sëmurin dhe Zoti do ta mëkëmbë … lutuni për njeri tjetrin, që të shëroheni” (Jakobi 5:15-16).
