Perëndia po i vendos pjesët së bashku
16. shtator e mërkurë
“Sepse trishtimi ynë … prodhon për ne” 2 Korintasve 4:17
Pa Fjalën e Perëndisë, shumica e përvojave tona në jetë nuk kanë aspak kuptim. Me të, ne mund t’i deshifrojmë përvojat tona. Pak gjëra janë më ngushëlluese ose më entuziazmuese sesa të dish se Perëndia është Ai që po e ndërton mozaikun e jetës sate. Ishte një hartograf londinez, John Spilsbury, të cilit i atribuohet komercializimi i puzzle-ve rreth vitit 1760. Gjatë Depresionit të Madh, ato u bënë të njohura në Amerikë si një formë argëtimi e lirë. Puzzle-at vijnë në të gjitha format dhe madhësitë, përfshirë edhe më të rejat dhe më të sofistikuarat — puzzle-at tredimensionale sferike. Por metoda e montimit nuk ka ndryshuar. Ajo kërkon bashkimin e copëzave me forma të çuditshme që ndërthuren me njëra-tjetrën. Çelësi është figura në kapakun e kutisë. Pa të, je i humbur.
Dhe kjo është arsyeja pse shumë prej nesh ndihen herë pas here të pafuqishëm dhe të pa shpresë — sepse copëzat e jetës sonë nuk duken sikur përshtaten bashkë dhe ne nuk mund ta shohim vizionin e Perëndisë për tërësinë e jetës sonë. Pak njerëz kanë vuajtur më shumë se apostulli Pal, megjithatë ai shkroi: “Prandaj nuk na lëshon zemra; por, edhe pse njeriu ynë i jashtëm shkon në shkatërrim, ai i brendshëm përtërihet nga dita në ditë. Sepse trishtimi ynë i lehtë që është vetëm për një moment, prodhon për ne, një peshë të pamasë e të pashoqe të amshueshme lavdie; ndërsa ne nuk i drejtojmë sytë ndaj gjërave që duken, por ndaj gjërave që nuk shihen, sepse gjërat që duken janë për një kohë, kurse ato që nuk shihen janë të përjetshme” (2 Korintasve 4:16–18). Po, gjëra të këqija u ndodhin njerëzve të mirë. Por Perëndia ka premtuar t’i riciklojë, t’i shpengojë dhe t’i përdorë ato për të mirën tonë dhe për lavdinë e Tij.
