Shërimi në Dhjatën e Vjetër
28. tetor e mërkurë
“Ai dërgoi fjalën e tij dhe i shëroi, i shpëtoi nga gropa” Psalmi 107:20
Dhjata e Vjetër është plot me premtime të shërimit si dhe me shembuj të shërimit të njerëzve nga Perëndia. “Shërbejini Zotit, Perëndisë tuaj, ai do të bekojë bukën tënde dhe ujin tënd; dhe unë do të largoj sëmundjen nga ti. Në vendin tënd nuk do të ketë asnjë grua që të dështojë, asnjë grua shterpë. Unë do ta plotësoj numrin e ditëve të tua” (Eksodi 23:25-26). “‘Po, unë do të të jap përsëri shëndet dhe do të të shëroj plagët e tua’, thotë Zoti” (Jeremia 30:17). “O Zot, Perëndia im, unë të kam klithur ty, dhe ti më ke shëruar” (Psalmi 30:2).
Dhe këtu ke disa shembuj të shërimit në Dhjatën e Vjetër: (1) Perëndia shëroi Naamanin nga lebra (shih 2 Mbretërve 5:14–15); (2) Elia ngjalli djalin e të vejës nga të vdekurit (shih 1 Mbretërve 17:17–24); (3) Perëndia shëroi infertilitetin e Anës (shih 1 Samueli 1:19–20); (4) Bijtë e Izraelit u shëruan kur u kafshuan nga gjarpërinjtë helmues në shkretëtirë (shih Numrat 21:4–9). Edhe përtej shërimit nga sëmundjet, Librat e Vjetër të Besëlidhjes tregojnë se Perëndia kujdesej për shëndetin e qëndrueshëm të popullit të Tij. Psalmi 105:37 thotë se kur Perëndia i shpëtoi izraelitët nga skllavëria në Egjipt “dhe e nxori popullin e tij me argjend dhe me ar, dhe nuk pati asnjeri ndër fiset e tij që të tronditej”.
Nëse Perëndia do të bënte këtë për fëmijët e Tij nën besëlidhjen e vjetër, mendo sa më shumë do të bëjë për ne që jemi “në Krishtin”, duke jetuar nën një besëlidhje më të mirë.
“Po tani Krishti … është ndërmjetësi i një besëlidhjeje më të mirë, që bazohet mbi premtime më të mira” (Hebrenjve 8:6). Prandaj fjala për ty sot është: Besoji Perëndisë për shërimin tënd.
