Lutu që Zoti të të shërojë
16. dhjetor e martë
“Dhe Jezusi…pati dhembshuri për të dhe shëroi ata që ishin të sëmurë” Mateu 14:14
Nëse po pyet veten: “Si mund të jem i sigurt se Perëndia është i gatshëm të më shërojë?”, lexo këtë: “Dhe erdhi tek ai një lebroz i cili, duke iu lutur, ra në gjunj dhe i tha: "Po të duash, ti mund të më pastrosh”. Dhe Jezusi, duke e mëshiruar, shtriu dorën, e preku dhe i tha: "Po, e dua, qofsh pastruar!". Dhe, posa tha këto, menjëherë lebra e la dhe u shërua…Por ai, sapo doli, filloi ta shpallë dhe ta përhapë fort faktin, saqë Jezusi nuk mund të hynte më publikisht në qytet, por qëndronte përjashta nëpër vende të vetmuara; dhe nga çdo anë vinin tek ai” (Marku 1:40-42, 45).
Perëndia, jo vetëm që është i gatshëm të na shërojë, por Ai i përgjigjet sëmundjes dhe vuajtjes sonë me dhembshuri. “Kur Jezusi i dëgjoi këto, u nis që andej me një barkë dhe u tërhoq në vetmi, në një vend të shkretë. Dhe turmat, kur e morën vesh, e ndiqnin në këmbë nga qytetet. Dhe Jezusi, kur doli nga barka, pa një turmë të madhe, pati dhembshuri për të dhe shëroi ata që ishin të sëmurë” (Mateu 14:13-14). “Dhe ja, dy të verbër që uleshin gjatë rrugës, kur dëgjuan se po kalonte Jezusi, filluan të bërtasin duke thënë: "Ki mëshirë për ne, Zot, Biri i Davidit” … Atëherë Jezusi ndaloi, i thirri dhe tha: “Çfarë doni të bëj për ju?”. Ata i thanë: “Zot, të na hapen sytë!”. Dhe Jezusi pati mëshirë për ta dhe ua preku sytë e tyre; dhe në atë çast u erdhi drita e syve dhe ata e ndiqnin” (Mateu 20:30, 32-34).
A është pakësuar fuqia e Perëndisë? Jo. A ka Ai më pak dhembshuri ndaj fëmijëve të Tij të shpëtuar sot se sa kishte për turmat me njerëz më përpara? Jo. Prandaj, shko tek Ai me besim, duke u lutur dhe duke besuar për shërimin tënd.
